مامش وعد مضبوط للواعدونه ،، لو مثلك يوافون چا ما نسونه
١١ فيلم عن الموسيقي .. 🎼
الموسيقي 🎵 .. يعتبر بقت شيء أساسي ف يومنا ف الفرح والحزن وحتي ف النوم ، وكل انسان بيحب الموسيقي بطريقته وبيستغلها بالطريقة اللي تريحه .. ولأن السينما والموسيقي مترابطين بشكل ما فكان لازم يحصل الدويتو ده ، تخيل بدل مشهد من البكاء ممكن أغنية ٥ دقايق تلخصلك اللي بتمر فيه وتفضل تعيد فيها لحد ماتهدي ، تخيل الموسيقي ف خلفية لمشهد رومانسي أو الموسيقي ف مشهد وداع أو موت ، تخيلها بعد اعتراف حد بحبه والاغاني اللي بتدور ف راسه ، ومن غير مانطول وبدون ترتيب للافلام خلينا نبدأ ..
1⃣ The Legend Of 1900 ( 1998 )
من يوم ماتوجدت البشرية علي الأرض كل إنسان كانت له حياة واحدة علي الكوكب ده ، منهم اللي استغل فرصته كاملة وعاش حياة يتحكي عنها ف الروايات ، ومنهم اللي ملحقش ياخد فرصته كاملة والموت خطفه بدري ، ومنهم اللي فضل يحاول لاخر العمر ومات بالقهر ، ومنهم اللي عاش قليل الحيلة مش قادر حتي يحاول .. لكن في النهاية كل إنسان كان له قصة تتحكي ف سهرة ادام القمر مع مقطوعة بيانو هادية .. لكن مين اكتر إنسان يقدر يعزف مزيكا حياتك ؟ .. مين اللي بمجرد ما يبص لملامحك هيعرف قصتك ويترجمها لمقطوعة تسكر روحك ؟ .. هو ( ١٩٠٠ ) .. بطل الفيلم ده .. اللي سافر لكل اراضي العالم وهو قاعد علي كرسي البيانو ، اللي لحد ما مات مكنش يعرف يعني ايه كلمة “ ماما ” ، اللي عزف لكل انواع البشر لكن كان بيخاف منهم ، اللي وحدته خلقت فلسفة ف مزيكته و قدرت توصل لكل إنسان سافر معاه ، اللي لآخر عمره كان نقي زي نغمات البيانو ، النشاذ مصابش روحه ، شخص يعتبر حالة زي قصتك .
حالة معاشتش الدايرة اللي بيدخلها كل إنسان من ساعه ميلاده لمماته ، لأنه ف النهاية وزي ما قال ان البيانو له بداية ونهاية ، ٨٨ حرف انت مالكهم ومعاهم تقدر تألف اللي انت عاوزه ، لكن الأرض هي بيانو الرب ، مفاتيح لا نهائية تخليك تايه وخايف ومرعوب من انك بس تحاول تعزف عليها ، لأنك ع الأقل متعرفش فين المفاتيح اللي هتلاقي نفسك فيها ، فمش هتعزف ف حياتك المقطوعة المثالية واخرك هتعزف شوية دوشة وهتموت واليأس معشش ف روحك . يمكن دي كانت فكرته عن الحياة علي الأرض ، لأنه عاش الحياة زي حيوان آليف ، بيهرب من كل شيء غريب ، لكن رغم كل ده ، ورغم انه مخدش فرصته ف الحياة كاملة زي كتير من اللي عزفلهم ، إلا أنه عاش قصة يتحاكي عنها ف الروايات زيهم وبدون موسيقي ف الخلفية ، لأن مع كل حرف ف قصته في طيف من النغمات بيحوم ف المكان ..
افضل فيلم اتقدم عن الموسيقي ف نظري ومستعد اكتب عنه تاني وتالت وعاشر والبيانو لو كان إنسان كان هيرفع القبعة لمخرج الفيلم ده ، يستحق وقتكم ، ويستحق تدوله فرصة وانا واثق أنه هيلمسكم .
2⃣ Walk The Line ( 2005 )
في ناس بتعيش وبتموت وهي من جواها بتتمني لو كان عندها موهبة ما تميزها عن غيرها وتونسهم ف وحدتهم لكن حتي اللي عندهم موهبة مش مبسوطين وبيتمنوا شيء ما ، ع الأقل بيتمنوا راحة النفس والبال ..
وانت انسان عادي بتشتغل عشان تصرف علي نفسك واسرتك الصغيرة مبيكونش همك اوي تعيش مع حد يشبهلك أو مؤمن بيك لأنك ف النهاية بتدور علي الاستقرار الأسري مش اكتر لكن مع نجاحك ف شيء اتمنيته زي المزيكا هتبقي محتاج من شريك حياتك أنه يفرح معاك ع الاقل ، أنه ميغيرش من نجاحك بل يشاركك ويشجعك اكتر ، وده اللي ملقهوش جوني كاش من زوجته بعد ما روتين حياته اتغير من بياع بيعدي ع البيوت ومحدش يشتري منه لمغني مشهور بيعدي ع القلوب ويخطفهم واحد واحد ، فضلت زي ماهي ست بيت روتينية بتدور علي حياة مملة وموت ف صمت .
وبين حب جديد لحد يشبهلك وإدمان للمخدرات و أزمات نفسية بسبب طفولتك كان في إنذار بالفشل والنسيان لكن زي ماقلت ، حد واحد مؤمن بيك بجد قادر ينقذك ويوصلك للقمة ، وهو ده اللي حصل ، وهي دي قصة الفيلم .
3⃣ Once ( 2006 )
الصدفة ، ويا محلي الصدفة لما تعرف اتنين بيحبوا المزيكا ببعض ، حد بيعزف وحد بيغني ، والجميل متقابلوش ف حفلة ، اتقابلوا ف المكان اللي يشبهم ، ف شارع بين المحلات والرصيف والناس .
عازف جيتار بيتعرف بواحدة بتبيع ورد وبتحب المزيكا أثناء عزفه ف الشارع ، وواحدة واحدة بيتعلق بوجودها ، الفيلم أغلبه حكايات عن الحب اللي انتهي واغاني ، الفيلم هادي ، مفهوش جو الإستعراضات والكادرات الجميلة ولا الديكورات اللي بتجمل المشاهد ولا الإقتباسات اللي تتاخد ، مفيش حاجة تثبت أنه فيلم عن الموسيقي غير أغانيه والموسيقي الهادية اللي ف تتابع الأحداث ، الفيلم خد اوسكار احسن فيلم اجنبي ف السنة بتاعته
4⃣ Amadeus ( 1984 )
محدش فينا ميعرفش مين هو موتسارت الموسيقار العظيم لكن كتير ميعرفش مين هو ساليري الموسيقار اللي كان بيكره موتسارت الشاب الصغير عشان اكتر منه موهبة ، الفيلم بيحكي السيرة الذاتية لموتسارت من وجهة نظر ساليري اللي طول الفيلم بيحاول يدمره ويسرق أعماله ويقضي عليه كمان ، الفيلم بيقربك لفن الأوبرا اللي مفيش منا كتير بيحبه بس عظمة الفيلم ده هتخليك تحس انك متخدر ادام الموسيقي دي ، الفيلم عظيم فعلا ومحتاج ريفيو طويل جدااا ، بس خليني اقولكم الفيلم ده فاز ب ٨ اوسكار ، اعتقد ده مقنع كفاية ليكم ، وخليني اقولكم أن ده وفيلم The Legend Of 1900 افضل فيلمين ف القايمة كلها ، التمثيل ممتاز ، مفيش ذرة ملل واحدة ، موسيقي اوبرالية عظيمة ، موتسارت وجنونه ، هتحبوه
5⃣ Singin’ In The Rain ( 1952 )
طالما اتكلمت عن سينما الموسيقي يبقي لازم احط الفيلم ده حتي لو لسه مشوفتوش ، لأنه واحد من أشهر الافلام الكلاسكية اللي كانت عن الموسيقي كإستعراضات واغاني وجو كله بهجة .
https://youtu.be/5_EVHeNEIJY ده ترايلر للفيلم للي حابب ياخد فكرة عنه وهو عن شركة افلام صامتة بتقرر تعمل فيلم إستعراضي موسيقي بعد مادخلت السينما الناطقة ، مع قصة حب بين فنان مشهور وكومبارس ، مش هقدر اقول ريفيو طبعا بس فيلم زي ده مش محتاج لريفيو الحقيقة
6⃣ La Vie En Rose ( 2007 )
للي ميعرفش مين هي اديث بياف أو ثقافته الموسيقية علي ادها شوية زي حالاتي فخلينا نقول انها أسطورة الغنا في فرنسا زي ما ام كلثوم وفيروز اساطير الغنا ف العالم العربي ، الفيلم بيحكي عن نشأتها ولما كانت بتغني ف الشارع لحد ماحد اكتشفها وخلاها تغني ف النادي بتاعه ، وعن حزنها وقت موت ابنها ، وفي الحقيقة الشخصيات الخالدة اسمها لوحده يعتبر ريفيو يعني لو حد قالك انا عندي فيلم بيحكي قصة حياة فيروز مش هتقوله قصته ايه ، هي فيروز اصلا قصة ، وهنا اديث بياف برضه قصة ، الفيلم فاز باوسكار احسن ممثلة ف دور رئيسي لماريون كوتيار مع أنه فيلم فرنسي .
7⃣ The Concert ( 2009 )
في افلام بتبقي من البداية للنهاية عن حدث واحد مهم بيجي ف نهاية الفيلم وطول الفيلم الأحداث ماشية ف اتجاهه سواء بالتحضير له أو بالسعي ناحيته ، حفلة أو فرح أو وظيفة او سفر أو سرقة بنك ، الفيلم ده عن حفلة مهمة لمجموعة من الموسيقين مطلعوش مسرح من ٣٠ سنة ويوم مايطلعوا هيكون ف اوبرا باريس بإسم اوركسترا البلشوي الروسي واللي ميعرفش مين هما البلشوي فدول يعتبروا من الأفضل ف أوروبا والعالم .
الفيلم دراما كوميدية عن واحد كان مايسترو اوركسترا البلشوي من ٣٠ سنة والحزب الشيوعي وقتها وقفه ف حفلة من حفلاته كان بيعزف فيها كونشيرتو تشايكوفسكي ، لكن دلوقت بقي بواب للأوبرا دي ، بيشوف فاكس من اوبرا باريس بتدعو اوركسترا البلشوي لحفلة هناك فبيخبي الرسالة وبيجمع الموسيقين صحابه من الشوارع ومن وظايفهم عشان ينتحل هو مايسترو البلشوي وينتقم ويعزف كونشرتو تشايكوفسكي كاملة ف باريس ويرجع للمجد من تاني وترجعله كرامته .
اجمل ما في الفيلم أحداثه الكوميدية لناس بقوا ابعد مايكون عن الموسيقي لدرجة أن واحدة منهم بقت شغالة بتدبلج افلام بورنو وهي بتخيط قميص لابنها تقريبا بس عموما الفيلم نضيف ،وطبعا مقطوعة النهاية ، ١٣ دقيقة من موسيقي الكمان العظيمة ..
8⃣ Begin Again ( 2013 )
هل ممكن أغنية تنقذ حياتك ؟ .. ده كان اسم الفيلم ف الأول قبل مايتغير بس الحقيقة هل ممكن لفيلم يخليك تحب الموسيقي ؟ .. اه .. الفيلم ده
الفيلم مبدأيا ماشي في خطين بيتحدوا سوا ف التلت الاول من الفيلم بسبب اغنية ، خط مارك و كيرا ، مارك أو دان منتج موسيقي معروف عنده شغف شديد بالموسيقي بيتفصل من شغله والخط التاني جريتا وديف الكابلز الموسيقي اللي بينفصلوا بسبب خيانة ديف ، بيتقابل دان وجريتا لأول مرة ف بار وبيعرض عليها يعملها البوم بعد مانبهر بصوتها ونظرا لعدم إقتناع شركته القديمة بصوتها بيعملوا البوم موسيقي وسط شوارع نيويورك .
محدش شاف الفيلم ده ومحبوش حتي لو مش ذوقه بس الفيلم فيه حاجة حلوة تعلقك بيه زي الطفل كل ما تلمحه ادامك مع ان كيرا مثلا كانت أول مرة تغني بس الغريبة أن صوتها كان احلي ما ف الفيلم . الفيلم مش مجرد اغاني وعلاقة حب منتهية ، لكن بيخش فيه خط عيلة دان كمان ، بنته ، مراته . صديق جريتا ، اغلب ناس شافت الفيلم وعرفاه بس صعب متكلمش عنه عشان عامل زي الشيكولاتة ، عارف طعمها ، بس معنديش مانع اكلها مليون مرة .
9⃣ Sing Street ( 2016 )
يمكن ده واحد من الأفلام اللي بحبها بدون سبب ، يمكن عشان قريب للبيئة المحافظة اللي خرجت منها ، البيئة الرمادية اللي أقصي حاجة جميلة فيها كانت افلام الابيض واسود واغاني الست ومصيف اسكندرية كل كام سنة ، وفكرة المدرسة الحكومي والأب والام اللي بيشتغلوا عشان يصرفوا عليك وخلصت الحكاية علي كدة ، مفيش كلام عن الألوان والأحلام والحرية والمغامرة ، الحياة اللي كان فيها حتة ناقصة معرفش ايه هي ..
الفيلم عن ولد مراهق أهله بيفكروا ف الإنفصال فبينقلوه لمدرسة اقل من مدارس الكنيسة ، واللي عشان يكلم بنت عاجباه بتشتغل موديل اتدعي أن عنده فرقة موسيقية ، فبيضطر يعمل فرقة وبيطلب منها تكون موديل ف الفيديو كليب بتاعهم . شخصيات الأبطال بسيطة ومش هتحسها غريبة عليك ، فكرة الاخ الكبير المحبط والاخت الصغيرة الدحيحة وفتوة المدرسة وأنانية الأهل ، كلها شخصيات واقعية .
اغاني الفيلم مش واو لكن انا حبيت الأجواء اللي ف مراحل صناعة اغانيهم وحبيت شخصية الأخ الكبير اللي حسيت أن المؤلف كتبها كويس . هو الفيلم عن شباب مراهقين ومش امريكي ومش عميق بس لطيف وخفيف .. هو لنفس مخرج افلام Begin Again و Once وده لوحده يشجع
🔟 Camp rock 1&2 ( 2008 , 2010 )
مفيش اكتر من افلام ديزني اللي اتعملت للمراهقين عن المزيكا بس ساعات بتطلب معايا اشوف فيلم خفيف لفنانين بحبهم لمجرد ان استرجع معاه ذكريات اول مرة شوفت فيها الفيلم ده ، خصوصا أن أول مرة شوفت الفيلمين من ٨ سنين تقريبا ، انا حطيتهم لأنهم قريبين لقلبي ومليش دعوة بجودتهم بس الإختلاف ف نوعية الأفلام مطلوب برضه
الفيلمين عن كامب صيفي لمسابقة غنا وعلي مدار الفيلم الاول بيجيبلك قصص حب الصيف وغيرة البنات من بعضها والكلام ده والفيلم التاني مسابقة بين كامبين وطول الفيلم هتسمع اغاني حلوة جدا ل Demi Lovato و Joe Jonas و Nick Jonas وده اللي خلاني احب الفيلمين اصلا .
بكدة اكون خلصت وفي افلام تانية برضه كنت هحطها بس انا مكنتش حابب اطول زي Lala land , Whiplash , Agust Rush , Ray
———
لو عجبكم الموضوع لايك او ريبلوج عشان يوصل لناس اكتر وشكر علي وقتكم 🌸
⏯ ▶ ⏭
